लातूरमध्ये निवडणूक रणधुमाळीत धक्कादायक प्रकार समोर आला असून निलंगा तालुक्यातील जिल्हा परिषद गटातील उमेदवार आणि उमेदवाराच्या पतीचे अपहरण झाल्याचा आरोप काँग्रेसकडून करण्यात आला आहे. काँग्रेसच्या उमेदवार अंजना चौधरी आणि पती सुनील चौधरी बेपत्ता असून त्यांचं अपहरण झाल्याचा संशय काँग्रेस जिल्हाध्यक्ष अभय साळुंखेंची यांनी पोलीस अधीक्षकांकडे केलेल्या तक्रारीत व्यक्त केला आहे.
प्रकरणामुळे राजकीय वर्तुळात खळबळ
लातूर जिल्हा परिषद आणि पंचायत समिती निवडणुकीची रणधुमाळी जोरात सुरू असतानाच एक धक्कादायक आणि खळबळजनक प्रकार समोर आला आहे. औसा विधानसभा मतदारसंघातील निलंगा तालुक्यातील तांबाळा जिल्हा परिषद गटातील उमेदवार आणि त्यांच्या पतीचा अचानक संपर्क तुटल्याने राजकीय वर्तुळात एकच खळबळ उडाली आहे.
उमेदवार अंजना सुनील चौधरी आणि त्यांचे पती सुनील चौधरी हे दोघेही गायब असल्याची माहिती समोर आली आहे. या दोघांचे अपहरण झाल्याची गंभीर तक्रार काँग्रेसचे जिल्हाध्यक्ष अभय साळुंखे यांनी थेट पोलीस अधीक्षकांची भेट घेऊन दिली आहे. या घटनेमुळे निवडणूक प्रक्रियेच्या पार्श्वभूमीवर अनेक प्रश्न उपस्थित होत असून, पोलीस प्रशासन या प्रकरणाचा कसून तपास करत आहे. आता या घटनेमागचं नेमकं सत्य काय, आणि चौधरी दाम्पत्याचा शोध लागतो का, हे पाहणं महत्त्वाचं ठरणार आहे.
मकर संक्रांतीच्या हळदी-कुंकवाला गेलेल्या उमेदवार परतल्याच नाहीत
अंजना चौधरी यांनी तांबाळा जिल्हा परिषद गटामधून आपला उमेदवारी अर्ज दाखल केला होता. काँग्रेस पक्षाकडून एसटी प्रवर्गासाठी त्यांना उमेदवारी देण्यात आली होती. मात्र, काल दुपारी आपल्या मैत्रिणीच्या घरी असलेल्या हळदी-कुंकवाच्या कार्यक्रमाला गेलेल्या अंजना चौधरी उदगीरथून परतल्याच नाहीत आज सकाळी प्रचाराचा शुभारंभ असल्याकारणामुळे गावातील काही लोक त्यांना बोलवण्यासाठी गेले असता सदरील प्रकार उघडकीस आला आहे. त्यांचे अपहरण झाल्याचा संशय काँग्रेस जिल्हाध्यक्ष अभय साळुंखे यांनी व्यक्त केला आहे. लातूरचे पोलीस अधीक्षक अमोल तांबे यांच्याकडे काँग्रेस जिल्हाध्यक्षांनी रीतसर तक्रार नोंदवून मुख्यमंत्र्याकडे या प्रकरणात लक्ष घालण्याची मागणी केली आहे.
