शहरात मध्यरात्री एखाद्या फिल्मी थरारालाही मागे टाकेल, अशी घटना घडली. गुन्हे शाखेच्या पथकाने जीवाची बाजी लावत चक्क धावत्या कारच्या बोनेटवर उडी मारून नशेच्या बाटल्यांची तस्करी करणाऱ्या टोळीचा पर्दाफाश केला. केंब्रिज चौक ते जिल्हाधिकारी कार्यालय अशा १५ किलोमीटरच्या थरारानंतर पोलिसांनी तिघांना बेड्या ठोकल्या असून, १८ लाख ७८ हजारांचा मुद्देमाल हस्तगत केला आहे.
शेख समीर राजासाब २४, रा. लातूर, सय्यद अल्ताफ वहाब २३, रा. उदगीर आणि उमर अब्दुल साहाब शेख ३६, रा. लातूर या तिघांना अटक केली आहे. तर मुख्य आरोपी अशपाक पटेल रा. चंपाचौक आणि लातूरच्या मराठवाडा मेडिकलचे चालक-मालक यांचा पोलीस शोध घेत आहेत. याप्रकरणी गुन्हे शाखा यांनी दिलेल्या माहितीनुसार, छत्रपती संभाजीनगर शहरात नाकाबंदी सुरू असताना एका संशयास्पद तवेरा कारला थांबण्याचा इशारा देण्यात आला, मात्र चालकाने गाडी न थांबवता ती सुसाट पळवली. पोलिसांनी पाठलाग सुरू केल्यावर आरोपींनी चक्क पोलिसांच्या अंगावर गाडी घालून त्यांना चिरडण्याचा प्रयत्न केला. हा धोकादायक प्रकार सुरू असतानाच पोलीस अंमलदार दादासाहेब झारगड यांनी विलक्षण धाडस दाखवले. त्यांनी स्वतःच्या प्राणाची पर्वा न करता थेट धावत्या तवेराच्या बोनेटवर उडी मारली आणि लाठीने काच फोडून गुन्हेगारांना रोखण्याचा प्रयत्न केला.
हा पाठलाग टीव्ही सेंटर ते जिल्हाधिकारी कार्यालय परिसरापर्यंत सुरूच होता. पंचायत समितीसमोर पोलिसांनी सापळा लावून पुन्हा कार अडवण्याचा प्रयत्न केला, तेव्हा आरोपींनी पोलीस अंमलदार गणेश सागरे यांच्या अंगावर गाडी घातली, ज्यात ते जखमी झाले. अखेर समोरून रस्ता ब्लॉक असल्याचे लक्षात आल्यावर आरोपींनी पळ काढण्याचा प्रयत्न केला, पण चार पथकांनी त्यांना घेराव घालून जेरबंद केले. पोलीस आयुक्त प्रवीण पवार स्वतः या संपूर्ण ऑपरेशनवर कॉन्फरन्स कॉलद्वारे लक्ष ठेवून होते.
नशेचा काळाबाजार आणि लातूर कनेक्शन….
या कारवाईत पोलिसांनी ३,१२० नशेच्या सिरप बाटल्या जप्त केल्या आहेत. तपासात धक्कादायक माहिती समोर आली की, लातूरच्या ‘मराठवाडा मेडिकल’मधून केवळ ८० रुपयांना मिळणारी ही बाटली संभाजीनगरात ४०० रुपयांना विकली जात होती. १८ लाख ७८ हजार रुपयांच्या मुद्देमालासह पोलिसांनी ही तस्करी मोडून काढली आहे. या धाडसी कारवाईमुळे शहरातील अमली पदार्थ विक्री करणाऱ्यांचे धाबे दणाणले आहेत.
