पुणे ग्रँड चॅलेंज टूर स्टेज–४ सायकल स्पर्धा आज, शुक्रवार (२३ जानेवारी) शहरातील मध्यवर्ती मार्गांवरून पार पडणार आहे. या पार्श्वभूमीवर वाहतूक व्यवस्थेत बदल करण्यात आले असून, रस्तेबंदीच्या फलकांमुळे नागरिकांमध्ये गोंधळ निर्माण झाला आहे. नरवीर तानाजी मालुसरे रस्ता, सहकारनगर परिसरातील काही अंतर्गत रस्ते; तसेच डेक्कन भागातील प्रमुख मार्गांवर सकाळी नऊ ते सायंकाळी सहा या वेळेत वाहतुकीसाठी पूर्ण बंदी दर्शवणारे फलक लावण्यात आल्याने नागरिकांत संभ्रम निर्माण झाला आहे.
सायकल स्पर्धेचा अखेरचा टप्पा पुणे शहरात पाषाण सर्कल-पुणे विद्यापीठ-सेनापती बापट रस्ता (बालभारती–पत्रकार भवन)-लॉ कॉलेज रस्ता-कर्वे पुतळा चौक-वनाझ–पौड रस्ता- नळस्टॉप-म्हात्रे पूल-सेनादत्त पोलिस चौकी-टिळक चौक-पुरम चौक-शंकरशेठ रस्ता-नेहरू रस्ता-लाल महाल चौक-स. गो. बर्वे चौक-नरवीर तानाजी वाडी चौक-गरवारे चौक-बालगंधर्व चौक अशा प्रमुख भागांतून असणार आहे. स्पर्धकांचा ताफा पुढे गेल्यानंतर संबंधित मार्ग तत्काळ खुले केले जातील, असे पोलिसांनी स्पष्ट केले.
स्पर्धेच्या मार्गावरील रस्ते टप्प्याटप्प्याने केवळ अर्ध्या तासासाठी बंद ठेवले जातील. स्पर्धक मार्गस्थ होताच तत्काळ रस्ते वाहतुकीसाठी खुले करण्यात येतील,’ असे अतिरिक्त पोलिस आयुक्त मनोज पाटील यांनी स्पष्ट केले असले, तरी नरवीर तानाजी मालुसरे रस्त्यासह डेक्कन परिसरातील प्रमुख रस्ते सकाळपासून सायंकाळपर्यंत बंद राहणार असल्याबाबतचे माहिती फलक ठिकठिकाणी लागल्याने पुणेकर संभ्रमात पडले आहेत.
मग, नऊपासून बंद का?
सायकल स्पर्धेचा अखेरचा टप्पा बालेवाडी येथून सुरू होऊन पाषाणमार्गे पुन्हा पिंपरी-चिंचवडच्या हद्दीत येणार आहे. त्यानंतर सायकलपटू पुण्यात येण्यासाठी साधारणपणे दुपारचे साडेबारा ते एक होतील. असे असतानाही शहरातील रस्ते सकाळी नऊपासून बंद करण्याचा निर्णय अनाकलनीय असल्याची प्रतिक्रिया पुणेकर व्यक्त करीत आहेत.
