भारतीय इक्विटी बाजार नियम, सिक्युरिटीज अँड एक्सचेंज बोर्ड ऑफ इंडिया (सेबी) ने PwC आणि EY या भारतीय युनिट्सच्या वर्तमान आणि माजी वरिष्ठ अधिकाऱ्यांसह अनेक व्यक्तींवर 2022 च्या येस बँकेच्या शेअर विक्री व्यवहाराशी संबंधित इनसाइडर ट्रेडिंग नियमांचे उल्लंघन केल्याचा आरोप केला असल्याचा रॉयटर्सने आपल्या नुकत्याच एका अहवालातून उघड केले आहे.
सेबीकडून बँकिंग स्टॉकमध्ये इनसायडर ट्रेडिंगचा आरोप
नोटीसनुसार, सेबीने अमेरिकन खाजगी इक्विटी फर्म कार्लाइल ग्रुप आणि ॲडव्हेंट इंटरनॅशनलच्या अधिकाऱ्यांवर या कराराशी संबंधित अप्रकाशित किंमत संवेदनशील माहिती किंवा UPSI शेअर केल्याचा आरोप केला आहे, जो इनसाइडर ट्रेडिंग नियमांचे उल्लंघन आहे. रॉयटर्सने ॲडव्हेंट, कार्लाइल, EY, PwC, यस बँक आणि SEBI कडून टिप्पणी मागितली, पण कोणीही प्रतिसाद दिला नाही.
काय आहे शेअर बाजारातील हे संपूर्ण प्रकरण
नोव्हेंबरमध्ये जारी केलेली ही नोटीस सार्वजनिक केलेली नाही आणि याआधी त्याची माहितीही दिलेली नव्हती. रॉयटर्सच्या वृत्तानुसार, पीडब्ल्यूसी आणि ईवायच्या दोन अधिकाऱ्यांसह सात व्यक्तींनी त्यांच्या कुटुंबातील सदस्य आणि मित्रांसह 2022 च्या शेअर ऑफरिंगपूर्वी येस बँकेच्या शेअर्समध्ये व्यापार करून बेकायदेशीर नफा कमावला. तसेच बहुतेक आरोपी अजूनही संबंधित कंपन्यांमध्ये कार्यरत आहेत.
कार्लाइल, अॅडव्हेंट, पीडब्ल्यूसी आणि ईवायच्या भारतातील अधिकाऱ्यांनी यूपीएसआय शेअर केले, ज्यामुळे इतरांना त्या माहितीच्या आधारे व्यापार करता आला असे सेबीने नोटीसमध्ये पुढे म्हटले. याव्यतिरिक्त, येस बँकेच्या माजी बोर्ड सदस्यावरही किंमत-संवेदनशील माहिती शेअर केल्याचा आरोप आहे. जुलै 2022 मध्ये येस बँकेच्या शेअर ऑफरिंगपूर्वीच्या व्यवहारांच्या चौकशीतून ही कारवाई झाली, ज्यामध्ये कार्लाइल आणि ॲडव्हेंटने मिळून 1.1 अब्ज डॉलर्समध्ये अंदाजे 10% हिस्सा विकत घेतला होता. त्यानंतर, 29 जुलै 2022 रोजी करार जाहीर झाल्यानंतर दुसऱ्या दिवशी बँकेचे शेअर्स सुमारे 6% वाढीसह उघडले होते.
ही नियामक कारवाई दुर्मिळ म्हणजे rare मानली जाते, कारण जागतिक सल्लागार आणि खाजगी इक्विटी कंपन्यांच्या वरिष्ठ अधिकाऱ्यांवर भांडवल उभारणीच्या व्यवहारांमध्ये इनसायडर ट्रेडिंगचा आरोप करते. सेबीकडून गेल्या काही वर्षांत बाजारातील फेरफार आणि इनसाइडर ट्रेडिंगविरुद्ध कारवाई तीव्र कारवाई करण्यात आली असून अलीकडेच, दुसऱ्या एका प्रकरणात नियामकाने बँक ऑफ अमेरिकाच्या इंडिया युनिटवर निधी संकलन प्रक्रियेदरम्यान इनसाइडर ट्रेडिंग नियमांचे उल्लंघन केल्याचा आरोप केला होता.
अप्रकाशित माहितीवर ट्रेडिंगचे आरोप
नोटीसमध्ये एकूण 19 व्यक्तींवर इनसाइडर ट्रेडिंग नियमांचे उल्लंघन केल्याचा आरोप आहे, ज्यापैकी 7 व्यक्तींनी विशेषाधिकारित माहितीच्या आधारे, तर चार जणांनी अशी माहिती शेअर केली. याशिवाय PwC आणि EY मधील आठ अधिकाऱ्यांवर कमकुवत अनुपालन प्रक्रियांसाठी कारवाईचा उल्लेख आहे.
शेअर ऑफरिंगपूर्वी, ॲडव्हेंटने कर सल्लागार सेवांसाठी EY ची नियुक्ती केली होती आणि येस बँकेच्या व्यवस्थापनाबद्दल अभिप्राय मागितला होता. स्वतंत्रपणे, येस बँकेने मूल्यांकन कामासाठी EY मर्चंट बँकिंग सर्व्हिसेसची नियुक्ती केली होती.
