मुख्यमंत्री देवेंद्र फडणवीस हे वर्ल्ड इकॉनॉमिक फोरमच्या वार्षिक परिषदेत सहभागी होण्यासाठी पाच दिवसीय दावोस दौऱ्यावर रवाना होत आहेत. रविवारी मध्यरात्री ते स्वित्झर्लंडकडे प्रस्थान करणार असून, १९ ते २३ जानेवारीदरम्यान हा दौरा पार पडणार आहे. या दौऱ्यादरम्यान महाराष्ट्रात मोठ्या प्रमाणात आर्थिक गुंतवणूक आकर्षित करण्यावर राज्य सरकारचा विशेष भर असणार आहे.
मुख्यमंत्र्यांसोबत राज्य सरकारचे वरिष्ठ अधिकारी तसेच महाराष्ट्रातील काही प्रमुख उद्योगपतींचे शिष्टमंडळही दावोसला जाणार आहे. वर्ल्ड इकॉनॉमिक फोरमच्या या प्रतिष्ठित वार्षिक परिषदेत जगभरातील विविध देशांचे राष्ट्रप्रमुख, राजकीय नेते, उद्योगजगतातील दिग्गज, गुंतवणूकदार आणि धोरणकर्ते सहभागी होणार आहेत. या व्यासपीठावर महाराष्ट्रातील औद्योगिक संधी, पायाभूत सुविधा, धोरणात्मक सुधारणा आणि गुंतवणूकस्नेही वातावरण यांचा सादर करण्यात येणार आहे.
• मुख्यमंत्री देवेंद्र फडणवीस पाच दिवसीय दावोस (स्वित्झर्लंड) दौऱ्यावर
• वर्ल्ड इकॉनॉमिक फोरम (WEF) च्या वार्षिक परिषदेत सहभाग
• जागतिक उद्योगपती, गुंतवणूकदार व आंतरराष्ट्रीय नेत्यांशी चर्चा
• महाराष्ट्रातील औद्योगिक गुंतवणुकीच्या संधी मांडणार
• ‘मेक इन महाराष्ट्र’ व ‘इज ऑफ डुइंग बिझनेस’वर विशेष भर
• हरित ऊर्जा, स्टार्टअप्स, डिजिटल परिवर्तनावर सादरीकरण
• परदेशी गुंतवणूक आकर्षित करण्यासाठी द्विपक्षीय बैठका
• विविध आंतरराष्ट्रीय कंपन्यांसोबत सामंजस्य कराराची शक्यता
• महाराष्ट्रात नवीन उद्योग व रोजगार निर्मितीला चालना अपेक्षित
• वरिष्ठ अधिकारी व उद्योग विभागाचे शिष्टमंडळ दौऱ्यात सहभागी
महाराष्ट्रासाठी गुंतवणूक आकर्षित करण्याच्या दृष्टीने हा दौरा अत्यंत महत्त्वाचा मानला जात आहे. मागील वर्षी दावोस परिषदेदरम्यान राज्य सरकारने तब्बल १६ लाख कोटी रुपयांचे सामंजस्य करार (MoU) केले होते. त्यापैकी सुमारे ७२ टक्के करार प्रत्यक्षात उतरल्याचा दावा मुख्यमंत्री देवेंद्र फडणवीस यांनी यापूर्वी विधानसभेत केला होता. यंदा मात्र राज्य सरकारने १६ लाख कोटी रुपयांहून अधिक गुंतवणूक करार करण्याचे उद्दिष्ट ठेवले आहे. त्यामुळे यंदाच्या दावोस दौऱ्यातून महाराष्ट्रात किती मोठी गुंतवणूक येते, याकडे उद्योगजगतासह राजकीय वर्तुळाचे लक्ष लागले आहे.
या परिषदेत महाराष्ट्रातील औद्योगिक गुंतवणुकीच्या संधी, पायाभूत सुविधा विकास, स्टार्टअप इकोसिस्टिम, हरित ऊर्जा, डिजिटल परिवर्तन आणि रोजगार निर्मिती यासंदर्भात मुख्यमंत्री फडणवीस महाराष्ट्राची भूमिका मांडणार आहेत. ‘मेक इन महाराष्ट्र’ आणि ‘इज ऑफ डुइंग बिझनेस’ या धोरणांवर विशेष भर देत राज्यात अधिकाधिक परदेशी गुंतवणूक आकर्षित करण्यासाठी विविध द्विपक्षीय बैठकांचे आयोजन करण्यात आले आहे.
यंदाच्या वर्ल्ड इकॉनॉमिक फोरम परिषदेचे एक प्रमुख आकर्षण म्हणजे अमेरिकेचे राष्ट्राध्यक्ष डोनाल्ड ट्रम्प. ट्रम्प यांच्याकडून दावोस परिषदेत सर्वात मोठे शिष्टमंडळ सहभागी होणार असल्याची माहिती असून, त्यामुळे या परिषदेला विशेष महत्त्व प्राप्त झाले आहे.
दरम्यान, भारतातून यंदा जवळपास १० राज्यांचे मुख्यमंत्री दावोस परिषदेसाठी उपस्थित राहणार आहेत. सध्याच्या जागतिक भू-आर्थिक तणावांच्या पार्श्वभूमीवर गुंतवणूक, जागतिक धोरणे आणि आंतरराष्ट्रीय निर्णयप्रक्रियेत भारताचा प्रभाव अधिक मजबूत करण्याचा प्रयत्न या दौऱ्यातून केला जाणार आहे. यासोबतच व्यापार, तंत्रज्ञान, ऊर्जा आणि पुरवठा साखळी (Supply Chain) या क्षेत्रांमध्ये भारताची भूमिका अधिक सक्षम करण्यावरही विशेष भर दिला जाणार असल्याचे सांगण्यात आले आहे.
एकूणच, मुख्यमंत्री देवेंद्र फडणवीस यांच्या या दावोस दौऱ्याकडे महाराष्ट्राच्या औद्योगिक आणि आर्थिक भविष्यासाठी अत्यंत महत्त्वपूर्ण पाऊल म्हणून पाहिले जात असून, या दौऱ्यातून राज्याला किती आणि कशा स्वरूपाची गुंतवणूक मिळते, याकडे सर्वांचे लक्ष केंद्रित झाले आहे.
मुख्यमंत्री फडणवीस यांच्यासोबत वरिष्ठ अधिकारी आणि उद्योग विभागातील प्रतिनिधींचे शिष्टमंडळही या दौऱ्यात सहभागी झाले आहे. हा दौरा महाराष्ट्राच्या औद्योगिक विकासाच्या दृष्टीने महत्त्वाचा ठरणार असून, जागतिक व्यासपीठावर राज्याची गुंतवणूकस्नेही प्रतिमा अधिक भक्कम करण्यासाठी तो उपयोगी ठरेल, असे सरकारकडून सांगण्यात आले आहे.
