फडणवीस-मोहोळांच्या निकटवर्ती नेत्याचे पोस्टर व्हायरल, पाहा कोण?

पुणे : राज्यात महापालिका निवडणुकीच्या निकालाला काही तास बाकी आहेत. महत्त्वाच्या महापालिकांपैकी एक असलेल्या पुणे महापालिकेच्या निकालाडे सर्वांचं लक्ष लागलेलं असणार आहे. मात्र पुण्यात भाजपच्या नेत्यांच्या विजयाच्या बॅनरची चर्चा होताना दिसतेय. निकाल लागण्याआधीच विजयाचे बॅनर लावण्यात आलेत. यामधील एका नेत्याला विजयच नाहीतर महापौर म्हणून बॅनरवर लिहिलं गेलं आहे. नेमका कोण आहे तो भाजपचा नेता? इतर कोणत्या नेत्यांनी बॅनरबाजी केलीय. जाणून घ्या.

पुण्यातील भाजपचे वरिष्ठ नेते असलेल्या गणेश बिडकर यांचे महापौर आणि विजयाचे बॅनर लागलेत. बॅनरवर महापौर साहेब असा उल्लेख केला गेला आहे. गणेश बिडकर हे भाजपचे निवडणूक प्रमुख होते, ते प्रभाग क्रमांक 24 मध्ये उभे असून त्यांच्या विरोधात रवींद्र धंगेकर यांचे पुत्र प्रणव धंगेकर हे निवडणुकीच्या रिंगणात आहेत. त्यामुळे पुण्यातील प्रतिष्ठेची लढतींपैकी ही एक लढत मानली जात आहे. गणेश बिडकर स्थायी समितीचे माजी अध्यक्ष होते, तसेच पुणे महानगरपालिका निवडणुकीचे प्रमुख म्हणूनही त्यांची नियुक्ती झाली होती. 2017 मध्ये बिडकर हे महापालिकेत भाजपचे सभागृह नेते देखील राहिलेले आहेत.

भाजपमध्ये प्रवेश केलेल्या सचिन दोडके यांचेही बॅनर झळकले आहेत. सचिन दोडके यांच्या कार्यकर्त्यांनी मतदान होताच नगरसेवकपदी निवड झाल्याचं घोषित करत बॅनर लावले आहेत. विधानसभा निवडणुकीत सुद्धा दोडके यांनी निकालाआधी लावले होते विजयाचे बॅनर मात्र त्यांचा तब्बल 50 हजार पेक्षा जास्त मतांनी पराभव झाला होता. विजय झाले तर नगरसेवक पदाची हॅट्रीक होणार आहे.

हायहोल्टेज असणाऱ्या प्रभाग क्रमांक 9 मध्ये कार्यकर्त्यांनी भाजप उमेदवार लहू बालवडकर यांच्या विजयाचे बॅनर लावलेत. ‘जनतेचा विश्वास विजयी झाला’ अशा आशयाचे बॅनर लागलेत. लहू बालवडकर यांच्या विरोधात राष्ट्रवादीचे अमोल बालवडकर रिंगणात आहेत. बाणेर-बालेवाडी मध्ये बालवडकर विरुद्ध बालवडकर लढाईकडे शहराचे लक्ष लागलेलं आहे. भाजपने 2017 मध्ये विजयी झालेले अमोल बालवडकर यांना उमेदवारी नाकारत लहू बालवडकर यांना उमेदवारी दिली होती. त्यानंतर अमोल बालवडकर यांनी मुरलीधर मोहोळ आणि चंद्रकांत पाटील यांनी आपला राजकीय बळी घेतल्याचे म्हणत थेट अजित पवारांच्या राष्ट्रवादीत प्रवेश उमेदवारी मिळवली होती.