पुण्यात या महिनाअखेर महत्त्वाचा पूल प्रवासासाठी खुला होणार

पुणे : सावित्रीबाई फुले पुणे विद्यापीठ प्रवेशद्वारासमोरील आचार्य आनंदऋषीजी चौक आणि गणेशखिंड रस्त्यावरील दीर्घकालीन वाहतूक समस्या सोडविण्यासाठी उभारण्यात आलेल्या एकात्मिक दुमजली उड्डाणपुलाच्या (डबलडेकर) शिवाजीनगर ते बाणेर आणि पाषाण या दुमजली उड्डाणपुलाच्या दुसऱ्या बाजूचे बहुतांश काम पूर्ण झाले आहे. महिनाअखेरीस पुलाची दुसरी बाजू वाहतुकीसाठी खुली करण्यात येणार आहे. त्यामुळे गेल्या अनेक वर्षांपासून वाहतूक कोंडीचा सामना करत असलेल्या वाहनचालकांना मोठा दिलासा मिळणार आहे.

विद्यापीठ चौकात दुमजली उड्डाणपूल

पुणे महानगर प्रदेश विकास प्राधिकरणाकडून (पीएमआरडीए) माण-हिंजवडी ते शिवाजीनगर मेट्रो प्रकल्पाचे काम सुरू आहे. या प्रकल्पाचा एक भाग म्हणून विद्यापीठ चौकात दुमजली उड्डाणपूल उभारण्यात आला आहे. या उड्डाणपुलाच्या पहिल्या स्तरावर दुहेरी वाहतूक, तर वरच्या स्तरावर मेट्रो मार्गिका असणार आहेत.

मुख्यमंत्री फडणवीस यांनी या पुलाच्या उद्घाटनासाठी न थांबता पूल सुरू करावा, अशी सूचना केली आहे. त्यामुळे येत्या महिनाभरात बाणेर आणि पाषाण मार्गाच्या दिशेने जाणारे मार्ग खुले करण्यात येणार आहेत. त्यामुळे शिवाजीनगरहून औंध, बाणेर आणि पाषाणकडे जाणाऱ्या प्रवाशांना गेल्या अनेक दिवसांपासून वाहतूक कोंडीचा सामना करत असलेल्या वाहनचालकांचा त्रास कमी होणार आहे.

गणेशखिंड रस्त्यावरील वाहूतक कोंडीतून मार्ग काढण्यासाठी उभारण्यात येत असलेल्या दुमजली उड्डाणपुलाच्या दुसऱ्या बाजूचे काम अंतिम टप्प्यात आहे. येत्या महिनाभरात शिवाजीनगरकडून बाणेर, पाषणकडे जाणारी बाजू वाहतुकीसाठी खुली करण्यात येणार आहे. हा पूल पूर्ण क्षमतेने सुरू होणार असल्याने या परिसरातील वाहतुकीचा ताण मोठ्या प्रमाणात कमी होणार आहे, अशी माहिती पीएमआरडीए, मुख्य अभियंता, रिनाज पठाण यांनी दिली आहे.

दृष्टिक्षेपात प्रकल्प

एकूण लांबी : 1763.52 मीटर

औंध – शिवाजीनगर लांबी : 1300.00 मीटर

शिवाजीनगर ते बाणेर बाजूकडील उड्डाणपुलाचे डांबरीकरणाचे काम पूर्ण

शिवाजीनगर बाजूकडील व बाणेर बाजूकडील रॅम्पचे काम अंतिम टप्प्यात

विद्यापीठ चौकात 55 मीटर लांब स्टील गर्डर

उड्डाणपुलाच्या आराखड्यात सेनापती बापट रस्त्यावरील वाहतूक या पुलाला जोडण्यात आली आहे.

सेनापती बापट रस्त्यावरून बाणेर आणि पाषाणकडे जाण्यासाठी उड्डाणपुलाला दोन मार्गिका रॅम्पद्वारे जोडण्यात आल्या आहेत.

प्रकल्पाची सद्यस्थिती

औंध ते शिवाजीनगर दिशेने येणाऱ्या बाजूचे काम पूर्ण झाल्याने गेल्या वर्षी 20 ऑगस्टला मुख्यमंत्री देवेंद्र फडणवीस यांच्या हस्ते उद्घाटन करून ही बाजू खुली करण्यात आली. या उड्डाणपूल प्रकल्पातील बाणेर, पाषाणकडील दोन बाजूंची प्रलंबित कामे अंतिम टप्प्यात आहेत.