पुणे : नरवीर तानाजी मालुसरे (सिंहगड) रस्त्यावर दिवसेंदिवस वाढत चाललेल्या वाहतूक कोंडीच्या समस्येची गंभीर दखल घेत महापौर मंजूषा नागपुरे यांनी संबंधित विभागांची संयुक्त बैठक घेऊन वाहतूक पोलिसांच्या कार्यपद्धतीवर नाराजी व्यक्त केली. या बैठकीत सिंहगड रस्त्यावरील वाहतूक कोंडीची कारणमीमांसा करून १५ दिवसांच्या आत सविस्तर सर्वेक्षण अहवाल सादर करण्याचे निर्देश वाहतूक पोलिसांना देण्यात आले.
मात्र, महापौरांनी दाखविलेल्या या तत्परतेचे स्वागत करतानाच शहरातील इतर प्रमुख रस्त्यांवरही अशीच भूमिका घेण्याची मागणी नागरिकांकडून होत आहे. महापौर या केवळ एका भागाच्या प्रतिनिधी नसून संपूर्ण पुणे शहराच्या प्रमुख आहेत. त्यामुळे सिंहगड रस्त्याप्रमाणेच कर्वे रस्ता, सातारा रस्ता, नगर रस्ता, सोलापूर रस्ता, बाणेर, हिंजवडी, कोथरूड, कात्रज, हडपसर, औंध, पाषाण, वारजे, धायरी, बावधन आणि इतर भागांतील वाहतूक कोंडीच्या समस्येकडेही त्यांनी तितक्याच गांभीर्याने लक्ष द्यावे, अशी अपेक्षा व्यक्त होत आहे.
पुणे शहरात गेल्या काही वर्षांपासून वाहतूक कोंडी ही नागरिकांसाठी मोठी डोकेदुखी ठरली आहे. वाढती वाहनसंख्या, अपूर्ण रस्त्यांची कामे, रस्त्यांवरील खड्डे, अनियोजित वाहतूक व्यवस्थापन आणि संबंधित विभागांमधील समन्वयाचा अभाव यामुळे दररोज सकाळी आणि संध्याकाळी हजारो वाहनचालकांना तासन्तास वाहतूक कोंडीत अडकून राहावे लागत आहे. परिणामी वेळेचा अपव्यय, इंधनाचा अतिरिक्त खर्च, वायू प्रदूषण आणि मानसिक ताण अशा अनेक समस्यांना नागरिकांना सामोरे जावे लागत आहे.
सिंहगड रस्त्यावर गेल्या काही दिवसांपासून वाहतूक कोंडीची समस्या अधिक तीव्र झाल्याच्या पार्श्वभूमीवर आयोजित बैठकीत महापौर मंजूषा नागपुरे यांनी वाहतूक पोलिसांना अनेक प्रश्न उपस्थित केले. “वाहतूक कोंडी होत असताना वाहतूक पोलिस घटनास्थळी का दिसत नाहीत?”, “सण, उत्सव आणि विविध कार्यक्रमांना परवानगी देताना वाहतुकीवर होणाऱ्या परिणामाचा विचार का केला जात नाही?”, तसेच “ध्वनी प्रदूषण आणि वाहतूक व्यवस्थापनाबाबत पोलिसांची जबाबदारी काय?” अशा प्रश्नांद्वारे त्यांनी संबंधित अधिकाऱ्यांची कानउघाडणी केली.
महापौरांनी वाहतूक पोलिसांना सिंहगड रस्त्यावरील संपूर्ण परिस्थितीचे सर्वेक्षण करून वाहतूक कोंडीची मूळ कारणे, आवश्यक उपाययोजना आणि दीर्घकालीन नियोजन यांचा समावेश असलेला अहवाल १५ दिवसांत सादर करण्याच्या सूचना दिल्या. या अहवालाच्या आधारे पुढील कार्यवाही करण्यात येणार असल्याचेही बैठकीत स्पष्ट करण्यात आले.
सिंहगड रोड क्षेत्रीय कार्यालयात झालेल्या या बैठकीला प्रभाग समिती अध्यक्ष सचिन मोरे, सहाय्यक पोलिस आयुक्त वसंत कुंवर, वरिष्ठ पोलिस निरीक्षक राहुल गौड, पोलिस निरीक्षक सुनील गवळी, सहाय्यक पोलिस निरीक्षक प्रियंका गोरे, सचिन पाटील, राष्ट्रवादी काँग्रेस (शरद पवार) पक्षाचे गटनेते काका चव्हाण, प्रसन्न जगताप, हरिदास चरवड तसेच इतर नगरसेवक आणि संबंधित अधिकारी उपस्थित होते.
दरम्यान, सजग नागरिक मंचाचे अध्यक्ष विवेक वेलणकर यांनी महापौरांच्या या उपक्रमाचे स्वागत करताना सांगितले की, सिंहगड रस्त्यावरील वाहतूक कोंडीबाबत बैठक घेणे ही सकारात्मक बाब आहे. मात्र, पुण्यातील अनेक प्रमुख रस्त्यांवर नागरिकांना दररोज यापेक्षाही मोठ्या वाहतूक कोंडीचा सामना करावा लागतो. त्यामुळे शहरातील सर्व भागांतील वाहतूक समस्यांचे सर्वंकष नियोजन करून त्यावर प्रभावी उपाययोजना करण्यासाठी महापौरांनी पुढाकार घेणे आवश्यक आहे.
नागरिकांच्या मते, वाहतूक कोंडी हा केवळ एका रस्त्याचा किंवा एका परिसराचा प्रश्न नसून तो संपूर्ण पुणे शहराशी संबंधित आहे. महापालिका, वाहतूक पोलिस, सार्वजनिक बांधकाम विभाग आणि इतर संबंधित यंत्रणांनी समन्वयाने काम करून कायमस्वरूपी उपाययोजना राबविल्यासच पुणेकरांना वाहतूक कोंडीतून दिलासा मिळू शकतो. त्यामुळे सिंहगड रस्त्यावर सुरू झालेली ही पुढाकाराची भूमिका शहरातील सर्व प्रमुख रस्त्यांपर्यंत पोहोचावी, अशी अपेक्षा नागरिकांकडून व्यक्त होत आहे.
