पुणे | प्रतिनिधी
पुणेकरांच्या अभिमानाचे प्रतीक मानला जाणारा ‘MH-12’ हा वाहन नोंदणी क्रमांक कायम ठेवण्यासाठी महत्त्वाची हालचाल सुरू झाली असून, केंद्रीय राज्यमंत्री तथा पुण्याचे खासदार मुरलीधर मोहोळ यांनी यासाठी थेट नवी दिल्लीत केंद्रीय रस्ते वाहतूक आणि महामार्ग मंत्री नितीन गडकरी यांची भेट घेत विशेष प्रस्ताव सादर केला आहे. या प्रस्तावाला केंद्र सरकारकडून सकारात्मक प्रतिसाद मिळाल्याने पुणेकरांमध्ये समाधानाचे वातावरण निर्माण झाले आहे.
पुणे शहराची ओळख केवळ ऐतिहासिक, शैक्षणिक किंवा सांस्कृतिक राजधानी म्हणूनच नाही, तर ‘MH-12’ या वाहन नोंदणी कोडमुळेही देशभरात आहे. अनेक दशकांपासून हा क्रमांक पुण्याच्या अस्मितेचा भाग बनला आहे. मात्र, पुण्यात वाहनांची संख्या झपाट्याने वाढत असल्याने विद्यमान ‘MH 12 ZZ’ ही शेवटची नोंदणी मालिका संपत आली आहे. त्यामुळे पुढील नोंदणीसाठी ‘MH-61’ हा नवीन कोड लागू होण्याची शक्यता व्यक्त केली जात होती.
या पार्श्वभूमीवर पुणेकरांकडून ‘MH-12’ ही ओळख कायम ठेवण्याची मागणी सातत्याने होत होती. ही भावना लक्षात घेऊन खासदार मुरलीधर मोहोळ यांनी नवी दिल्लीत केंद्रीय मंत्री नितीन गडकरी यांची भेट घेतली आणि ‘MH-12’ हा कोड कायम ठेवत नव्या स्वरूपातील नोंदणी प्रणाली लागू करण्याचा अभिनव प्रस्ताव मांडला.
या प्रस्तावानुसार ‘MH 12 1A’, ‘MH 12 1B’, ‘MH 12 1C’ अशा स्वरूपातील नवीन मालिका सुरू करण्याचा पर्याय सुचविण्यात आला आहे. म्हणजेच विद्यमान ‘MH-12’ कोड कायम राहील, मात्र त्याअंतर्गत अतिरिक्त अंक आणि इंग्रजी अक्षरांच्या साहाय्याने लाखो नवीन वाहनांची नोंदणी करता येईल. अशी प्रणाली लागू झाल्यास ती देशातील वाहन नोंदणी व्यवस्थेतील एक महत्त्वाचा आणि अभिनव बदल ठरण्याची शक्यता आहे.
सूत्रांच्या माहितीनुसार, केंद्रीय मंत्री नितीन गडकरी यांनी या प्रस्तावाची दखल घेत सकारात्मक भूमिका व्यक्त केली असून, संबंधित अधिकाऱ्यांना आवश्यक त्या सूचना देण्याचे आश्वासन दिले आहे. त्यामुळे पुण्याची ऐतिहासिक ओळख जपली जाण्याची शक्यता अधिक बळकट झाली आहे.
सध्या पुणे प्रादेशिक परिवहन कार्यालयामध्ये ‘MH 12 ZZ’ ही अंतिम मालिका सुरू आहे. ही मालिका संपल्यानंतर पुढील नोंदणी प्रक्रियेबाबत अंतिम निर्णय केंद्र सरकार आणि परिवहन विभागाकडून घेतला जाणार आहे. मात्र, खासदार मुरलीधर मोहोळ यांच्या पुढाकारामुळे ‘MH-12’ हा पुणेकरांच्या भावनांशी जोडलेला वाहन नोंदणी क्रमांक कायम राहण्याची आशा आता अधिक दृढ झाली आहे.
वाहन नोंदणी क्रमांक हा केवळ प्रशासकीय ओळख नसून शहराच्या इतिहासाशी आणि नागरिकांच्या भावनांशी जोडलेला विषय आहे. त्यामुळे ‘MH-12’ कायम ठेवण्याच्या प्रस्तावाला पुणेकरांकडून मोठा पाठिंबा मिळत असून, अंतिम निर्णयाकडे संपूर्ण शहराचे लक्ष लागले आहे.
